Hotel Bellavista – sur tschient ons vegl
Eir scha da dadoura nossa chasa para dad esser fabrichada ils ons sessanta schi dadaint as chatta stizis chi mainan fin aint il 19avel tschientiner.
Dal 1905 han sar Nikolaus Lötscher e sia duonna Anna Lötscher-Pinösch cumprà il hotel Victoria e til dat il nom Bellavista. L’hotel Victoria d’eira gnü fabrichà da la famiglia Pinösch dal 1886, davo l’ultim grond incendi a Ftan.
L’hotel es restà ils mans da la famiglia Lötscher fin dal 1965. Dal 1946 fin il 1965 han duonna Nina Lötscher e sias figlias manà l’hotel.
In quists prüms sessanta ons bleras persunas cuntschaintas sun stattas sco giasts a l’hotel Bellavista. Tanter oter Marlene Dietrich, Yehudi Menuhin, Hans Albert Einstein (il figl dad Albert Einstein), Margrit Rainer, Ruedi Walter e blers oters plü.
Dafatta il prinzi Charles es stat in visita pro giasts dal 1963. Chi sà sch’el s’algorda?
L’hotel Bellavista es adüna stat ün lö da represchantar per il lö da cura Ftan.
Fingià bainbod dispuoniva l’hotel Bellavista sur dad ün s-chodimaint central, aua currainta fraida e choda illas chombras, telefon e davent dal 1928 dafatta sur dad ün distributur da benzina.
La bella veranda da culaziun offriva üna bella vista, il prospect faiva recloma cun „ün’atmosfera cumadaivla e calma davo sport strapatschant“.
Il restorant d’eira eir il lö d’inscunter per ils indigens e la plazza per bleras festas da cumün sco il ball da Schüschaiver o festas da famiglia. Pro l’hotel Bellavista toccaiva eir la dependance Collina (la chasa jelga in direcziun baselgia) e la sala da repos ainz il üert tanter las duos chasas.
Da’l 1965 es l’hotel gnü vendü al sanitar Maini Gross chi ha renovà la chasa tenor il standard modern dals ons sesanta (isolaziun extrena, mincha chombra cun bogn o duscha, infrastructura moderna in chadafö, lavanderia, büro, lift tanter chadafö e sala, ingrondimaint da la sala da mangiar e. u. i.) e tilla ha dat la fuorma mantgnüda fin hoz. La structura veglia da la chasa es gnüda integrada illa fuorma nouva. Quai es avant tout visibel schi’s conguala purtrets da la fatschada veglia cun purtrets da la fatschada nouva.
Aint in chasa as chatta adüna amo Stizis dal temp dals Lötschers, per exaimpel la stüva e la chombra sülla prüma etascha da dschember.
La veranda veglia es gnüda integrada illa sala ed il local per skis d’eira plü bod ün local avert vers ost.
Ils prossems ons es la chasa gnüda manada da differents fittaders infin cha la cità dad Aarau ha cumprà la chasa al cumanzamaint dals ons settanta sco chasa da chomps. Ils 33 ons seguaints han tschients scoulars dad Aarau passanta lur chomps da scoula e vacanzas a Ftan illa chasa da chomp luxuriusa Bellavista (mincha chombra cun bogn o duscha, generusas stüvettas, in tschinch minuts vicinaza da la regiun da skis ed üna chadafö servida).
Per cas ans esa stat pussibel da cumprar il Bellavista in schner 2005 ed uschea es la chasa tuornada ils mans dad indigens. La chasa Bellavista es danouvmaing l’hotel Bellavista e cumpletta l’hotelleria da Ftan.
Pass a pass vulaina renouvar e modernisar L’hotel Bellavista ed uschea crear üna chasa plaina da vita ingiò cha tuots as saintan bain.